Марий Эл вуйлатыше Юрино районышто сӧсна африкан чума карантин шотышто указым подписатлен.
Карантин Юрино районын посна кумдыкыштыжо увертаралтме нерген республик вуйлатыше Юрий Зайцев 25 августышто лукмо 173-шо №-ан указыштыже палемден.
Тудо Юркино поселкышто «Юркинский» сонар озанлыкын инфицироватлыме объектшым – холодильный камерым – шындаш кӱштен. Карантин жапыште инфицироватлыме кумдыкыш республикысе чер шарлымашым пытараш кугыжаныш учрежденийлаште ветеринарий дене кылдалтше пашам шуктышо специалист-влак ден ты пашам шукташ ӱжмӧ специалист деч моло еҥлан пураш чаралтеш. Тыгак тушеч вольык озанлык сатум лукташ чарыме.
Тиде указ шукталтмым эскераш Марий Эл правительстве председательын алмаштышыже Дмитрий Троицкийлан ӱшаныме.
Л.Камалетдинова
