36 еш пиалан кечым вучен шуктен

36 еш пиалан кечым вучен шуктен
11.07.2017
Пытартыш жапыште ятыр вере еҥ-влакым чот тоштемше пӧртла гыч уыш илаш кусарат. Кодшо кечылаште Медведево районысо Сурок поселкышто илыше икмыняр еҥымат тыгай куанле тат вучен – тыште 36 ешлан у пачер сравочым кучыктеныт. Тиде сомылым Александр Евстифеев шуктен.
 
Сравочым кучыктымеке, Александр Александрович илыме вер-влакым озашт дене пырля ончен савырнен. Кузерак чоҥымым ончыкташ тудым Горбачевмыт еш шкеж деке ӱжын. Калык пале дене келшышын, пӧртыш эн ончычак пырысым колтат. Тыштат тыгак ыштеныт да пырысигым пуртеныт, вара оза ден уна-шамыч эртеныт.
 
- Тиде событий – пайрем. Россий президентын майысе указшым шуктымылан да шуко еҥын илыме вер условийжым саемден кертмылан куанена. Еҥ-влакым шӱкшӧ пӧртла гыч уыш кусарышашлан окса роскотын кугу ужашыжым шке ӱмбакше налмылан Россий правительствылан тауштена, - ойлен Александр Евстифеев республикысе СМИ-н журналистше-влаклан пуымо интервьюштыжо.  
 
Палемдымыж почеш, у пачерыш илаш куснышо-влаклан тыште чылажат келша, поснак пӧлемлаште ыштыме пашан качествыже да кудывечыште йоча-влаклан модаш келыштарыме площадке улмо куандара.
 
2013-2016 ийлаште Медведево районышто 473 у пачер ойыралтын. Тидын годымак   20 тӱжем утла квадрат метр тошто илыме верым пужен кораҥденыт. Пӱтынь республик мучко ончалаш гын, тиде жапыште аварийныйлан шотлалтше 72 тӱжем квадрат метр наре кумдыкым ронченыт, 5000 утла еҥ илыме условийжым саемден.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")