24 еҥлан пиал шыргыжалын

24 еҥлан пиал шыргыжалын
09.12.2014
Марий Эл вуйлатыше Леонид Маркелов ончыгече ийготыш шушо тулык икшыве ден ача-ава деч посна кодшо ӱдыр-рвезе-влаклан пачер сравочым кучыктен. Тиде торжественный мероприятийыште Йошкар-Олан мэрже Павел Плотниковат лийын.  
 
Чылаже 24 самырык еҥлан пиал шыргыжалын. Нуно ынде Йошкар-Оласе Ян Крастынь уремыште верланыше шуко пачашан ик пӧртыштӧ илаш тӱҥалыт. 
 
Нине ӱдыр-рвезым саламлышыла, Леонид Маркелов илыме вер дене кылдалтше программым илышыш шыҥдарымаш республикысе правительствын пашаштыже ик эн тӱҥ манын палемден.
 
– Ончыкылык – самырык-влакын кидыште. У, шкендан пачерыштыда илышда пиалан, куан тат дене темше лиеш манын ӱшанем. Ончыкыжым те республикым вияҥдымашке шке надырдам пыштеда, шонена,– сравочым кучыктышыжла ойлен Л.И.Маркелов.
 
Саламлымеке, Марий Эл вуйлатыше пачер-влакым ончен савырнен. Ялтаевмыт кугу унам изи азашт дене пырля вашлийыныт.
 
– У пӧртыштӧ пачерым налмемлан мый моткочак куаненам. Тыште чылажымат сайын ыштыме. Икшывыланнат тыште сай лиеш манын ӱшанем. Куанлан мучаш уке,– йывыртымыжым шылтыде ойлен пачер сравочым налше Динара Ялтаева.
 
Тылеч вара республик вуйлатыше самырык ешым эше ик гана саламлен да икшывыштлан пӧлекым кучыктен.
 
Пытартышлан Леонид Маркелов республикын правительствыже ончыкыжымат программым шукташ, илыме верым чоҥаш да тудым закон дене келшышын кӧ налшаш, нунылан ойыраш тӱҥалеш манын палемден.
 
Тулык да ача-ава деч посна кодшо икшыве-влаклан илыме верым ситарыме пашалан тений 91 129,7 тӱжем теҥге ойыралтын. Тиде окса 81 еҥлан илыме верым ойыраш да найм ойпидыш дене илыме 50 пӧлемым налаш колталтын. 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")