2024 ий – Ешын идалыкше.Тӱҥалтыш ышталтын

Юрий Зайцев Марий Элыште Ешын идалыкшым почын.

Тидлан пӧлеклалтше торжественный мероприятий 29 январьыште Э.Сапаев лӱмеш Марий кугыжаныш академический опер да балет театрыште эртен.

Театрын залышкыже шуко шочшан, кужу жап пырля илыше еш-влак, СВО-н участникше-влакын ешышт, профессиональный династий-шамыч чумыргеныт. Марий Эл вуйлатыше Юрий Зайцев нуным саламлен да регионышто Еш идалыклан тӱҥалтышым пуэн.

– Таче ме Марий Элыште Ешын идалыкшым почына. Российыште илыше-влак шке тукым-вожыштым палат, шарнат да аклат. Тиде чыла шотыштат палдырна: тыглай илышыште, йоча-влакым ончен-куштымаште, эртыше, кызытсе да ончыкылык дене кӱрлаш лийдыме кылыште. Кузе каласен президентна, Россий – тиде еш-влак еш. Ӱшанем, 2024 ийыште Марий Элыште еш дене кылдалтше тӱрлӧ оҥай мероприятий лиеш, – каласен Юрий Зайцев.

Тудо тыгак регионышто илыше-влак «Уло еш дене» всероссийский проектыш ушнен кертыт, да тидыже нунылан икте-весышт дене пырля каналташ, уло еш дене пырля жапым эртараш, ваш-ваш утларак лишемаш полша да йӧным пуа манын палемден.

Марий Эл вуйлатыше еш йӱлам аралымыштлан да чолгалыкым ончыктымыштлан 11 ешлан наградым кучыктен.

– Икте-весе дене ваш келшен илыза. Йочам ыштыза да нуным мемнан кумда Шочмо элнан чын патриотшо семын ончен куштыза, – тыланен Юрий Зайцев.

Тиде торжественный мероприятийыштак «Лишыл – Йӧратыме» всероссийский еш форумын сеҥышыже Шабдаровмыт еш Всероссийский еш возак деч чӱктымӧ лампадым Йошкар-Олан ЗАГС-шылан кучыктен. Тушто Муромысо Свято-Троицкий монастырь гыч кондымо тул йӱла. Лач ты монастырьыште ешын аралтышыже-влак шнуй Петр ден Феврониян мощьыштым вераҥдыме.

Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен