Кок ийыште ныл школ чоҥалтшаш

Марий Элыште кок ийыште чумыр налмаште 2710 веран ныл школым чоҥаш палемдыме. Тидын нерген эртыше кугарнян республикын правительствыжын заседанийыштыже регионым вуйлатыше Александр Евстифеевлан Марий Эл образований да науко министр Лариса Ревуцкая увертарен.

Проект-шамыч дене келшышын, Йошкар-Олаште 825 веран кыдалаш, Килемар районысо Кугу Памъялыште 60 тунемшылан да 20 дошкольниклан тӱҥ школлам чоҥаш палемдыме. Нине тунемме верлам концессий соглашений кышкарыште ышташ тӱҥалыт: тудын условийже почеш инвестор-влак чоҥат веле огыл, школлан кӱлешан оборудованийым налшаш, тыгак ойпидышын срокшо эртыме объектым технический могырым обслуживатлышаш улыт.

Эше кок школым Россий Федерацийын «Образований вияҥмаш» кугыжаныш программыж дене келшышын чоҥаш палемдыме: 1100 вераным Йошкар-Олаште да 725 тунемшылан Медведево районысо Руэм посёлкышто.

Образований да науко министр «Образований» нацпроектым илышыш пуртымо шотышто ойлымыж годым палемден: республикын правительствыжын тыршымыжлан кӧра Марий Турек районысо Сардаялыште да Медведево районышто у школ-влакым ончылгоч чоҥен шуктымо. Тидын деч посна 119 у инфраструктур объектым ыштыме шотышто паша умбакыже шуйна, нуныжо шушаш у тунемме ийлан ямде лийшаш улыт. Тений тыгак 22 «Кушмо точко» тунемме рӱдерым почаш палемдыме. Кызыт Йошкар-Оласе 29-ше №-ан школышто «Кванториум» йоча технопарк ышталтеш, тушто икшыве-шамыч естественно-научный предметлам келгынрак тунемаш тӱҥалыт.

Тений республикыштына Политехнический лицей-интернат пелен «IT-куб» цифран образований рӱдер почылтшаш, тушто самырык еҥ-влаклан ик эн кумдан шарлыше йылмыла дене программированийын негызшым, смартфонлан приложенийым ышташ тунемаш йӧн лиеш. Общеобразовательный организацийлаште цифран кумдыкым вияҥдаш манын, 37 школлан у компьютер обороудованийым пуат. «Образований» нацпроектын кугу блокшо йоча-влаклан ешартыш образованийым пуымо системылан пӧлеклалтын: тений 1543 у вер лиеш.

Начар тазалыкан икшыве-шамычлан поснак кугу тӱткыш ойыралтеш. 2022 ийыште Кужэҥер районысо Руш-Шой ден Савино коррекционный школ-интернат-шамычын материально-технический базышт уэмдалтеш. Лариса Ревуцкая ешарен: республикыште школ образований системым уэмден вияҥдыме паша тӱҥалын. Тудын кышкарыштыже 2026 ий марте 102 школым капитально олмыкташ палемдыме, а 2022 ийыште – кудытым (кокытым Параньга районышто, кумытым Советский кундемыште да иктым Медведево велне). Школлаште шокшо кочкышым яра пукшымо шотышто паша ышталтеш: Килемар районысо Йӱксар школын интернатшым чоҥен шуктымо да тушко у пищеблокым вераҥдыме; Оршанке районысо Кугунур школ пелен пищеблокым ыштыме сомыл умбакыже шуйна.

Заседанийыште образовательный организацийым концессий соглашений йӧн дене чоҥымо шотышто Чоҥымаш, ахитектур да илыме вер-коммунал озанлык министр Михаил Степанов каласкален.

Марий Элым вуйлатыше Александр Евстифеев муниципальный районласе да ола округласе администрацийлам вуйлатыше-влаклан тений 20 август марте образований дене кылдалтше объектлаште капитально олмыктымо пашам ыштен шукташ темлен.

«11 май марте Шернур районлан Шабдар Осып лӱмеш Мустай школым, Оршанке районлан Нужавлак школым уэмдыме шотышто документым ямдылен шукташ», – каласен регионым вуйлатыше.

Заседанийыште каҥашыме моло йодыш Йошкар-Олаште, Волжскышто очистной сооруженийым, тыгак рӱдолаште йыр корным чоҥымо дене кылдалтше лийын. Рӱдолаште йыр корным чоҥымо шотышто ойлымыж годым республикын транспорт да корно озанлык министрже Александр Герасименко увертарен: проектым илышыш пурташ тӱҥалме жап гыч кызыт марте кугу пашам ыштыме да тудо умбакыже шуйна. Ленин проспектыште улшо кӱвар шотышто каҥашыме годым регионым вуйлатыше палемден: тиде объект кугу тӱткышым йодеш, сандене тудым уэмдыме паша моткоч сайын ышталтшаш, тыгодымак кеҥеж жаплан корнышто «пробко» лийшаш огыл.

Александр Евстифеев Кугу Отечественный сарыште Сеҥымашлан 77 ий теммым палемдаш ямдылалтме шотышто йодышым посна нӧлталын, пайремым кӱлеш кӱкшытыштӧ эртараш кӱштен.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.