Кучемыште Марий Эл – икымше верыште

Национальный да федеральный проект-влакым илышыш кузе шыҥдарымым теҥгече Россий Федерацийыште региональный вияҥмаш шотышто правительственный комиссийын президиумжын заседанийыштыже каҥашеныт. Тудым Российысе регион вуйлатыше-влак дене Россий правительстве председательын алмаштышыже Марат Хуснуллин видеоконференций йӧн дене эртарен.

Заседанийын пашашкыже Марий Эл вуйлатыше Александр Евстифеев ушнен.

РФ правительствын «светофоржо-влак» дене келшышын, «Ял кумдыкым комплексно вияҥдымаш» программе дене 11 апрельлан Марий Эл 1-ше верыш лектын. Корным чоҥымаш дене ме 4-ше верыште улына. «Юлым тазаҥдымаш» федеральный проектым илышыш пуртымаште республик 9-ше верым айла.

Ушештарена: «Юлым тазаҥдымаш» проект дене келшышын, тений Марий Элыште канализацийым эрыктыме кок объект чоҥалтеш. Ты пашам шукташ контрактым тӱрыс кугытлан ыштыме. Тидлан федеральный бюджет гыч 217,3 млн.теҥге ойыралтеш.

«Регионысо да верысе корно сеть» региональный проект дене келшышын, тений 50 вере корно кумдыкым шотыш кондышаш улыт. Шушаш ийын – 55 вере. А 2024 ийлан палемдыме объектлаште пашам могай подрядный организаций-влак шуктышашым тений 1 май гыч рашемдаш тӱҥалыт.

Федеральный программе дене келшышын, корным ыштыме да шотыш кондымо пашам шукташ 4 981,4 млн. теҥге ойыралтшаш.

Марий Эл вуйлатышын организаций да аналитике виктемжын уверже негызеш Л.Камалетдинова ямдылен