16 гыч иктыже – Поянсолаште

16 гыч иктыже – Поянсолаште
19.11.2014
Икмыняр тылзе жапыште Марий Элыште 15 ФАП-ым чоҥеныт. Лач латвизымшыжымак 19 ноябрьыште Звенигово районысо Поянсола ялыште почыныт. Тушко республик вуйлатыше Леонид Маркелов миен.
 
Ты районышто тиде кокымшо фельдшер-акушер пункт. Икымшыжым Илеть поселкышто тений 9 октябрьыште почыныт.
 
Поянсола ФАП вуйлатыше Людмила Черняева здравоохранений системыште 46 ий тырша. Ойлымыж почеш, тиде жапыште шӱкшӧ, аварийныйлан шотлалтше оралтыштат, вараже мыняр-гынат келыштарыме зданийлаштат пашам ышташыже пернен. Санденак Марий Эл вуйлатыше дене пырля кызытсе жаплан келшен толшо пӧлем-влакым ончен савырнымышт годым куанжым шылтен огыл да пенсий ийготан гынат, тыгай сай условийыште пашам ышташ шонымыж нерген ойлен.
 
Тыгай вашталтышлан врач Ирина Смаиловат куанен. Тудо Марий Элыш Пермь край гыч толын. Самырык специалистлан Звенигово олаште вигак служебный илыме верым пуэныт. 32 ияш врач Кужмарий амбулаторийыште ынде нылымше ий пашам ышта.
 
Поянсола ФАП-ыште медицине полышым кум ялыште: Поянсолаште, Нурдамучаште да Нурӱмбалне – илыше калыклан, чылаже 900 наре еҥлан, пуаш тӱҥалыт. Тиде пунктышто физиолечений отделений, фельдшерын, педиатрын, акушерын кабинетышт, процедурный, перевязочный, прививочный, стерилизаций пӧлем – икманаш, сай медицине полышым пуаш тыште ынде чыла уло.
 
Тиде событий дене саламлышыжла, Леонид Маркелов ял калыклан илашыже медицине учреждений моткочак кӱлешан манын палемден. Вет лач фельдшер-акушер пунктлаште черле-влак икымше полышым, консультацийым налын, уколым ыштыктен кертыт.
 
Республик вуйлатыше палемден: Марий Элыште модульный ФАП-влакым чоҥымо программе умбакыже шуйна. Тенияк лишыл жапыште эше ик ФАП Кужэҥер районышто почылтшаш. А вес ийын эше 20 тыгай учрежденийым ышташ палемдалтеш. Нунын кокла гыч кокытшо Звенигово районысо Шемшӱргӧ ден Нуктыж яллаште лийыт.
 
Регион вуйлатышым верысе калык куштымаш дене ужатен. Кугу унам пагалымым,  тудлан национальный вургемын сӧраллыкшым тӱрыс ончыкташ манын, ӱдырамаш-влак, юалге игечым шотыш налде, ӱмбал вургемыштым кудашыныт. Но Леонид Игоревич тазалык кӱлешанрак манын да, курткыжым кудашын, иктыжын вачышкыже пыштен. Тидыже, мутат уке, ӧрыктарыде да куандарыде коден огыл, санденак чыланат тудлан совым кыреныт.
 
Совым кырыме йӱкешак пытартышлан Марий Эл вуйлатыше Леонид Маркелов погынышо-влак дене мутланен да нунын йодышыштлан вашештен.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")