Пытартыш кок
арняште республикнан инфекционный стационарлашкыже коронавирус дене нелын
черланыше пациент-влакым поснак шуко пыштыме. Тидын нерген 11 январьыште Марий
Элым вуйлатыше Александр Евстифеевын эртарыме правительстве коллегийын
заседанийыштыже регионын тазалыкым аралыме министрже Марина Панькова увертарен.Ведомствым
вуйлатышын палемдымыж гыч, ситыдымашын амалже пациентын эмлымверыш пеш вараш
кодын мийымыж дене кылдалтын. Таче республикнан 10 медицине организацийыштыже COVID-19
дене черланыше-шамычым эмлаш келыштарыме 1494 койко уло. Тушто кече еда 900
утла пациент эмлалтеш.
Стационарлашке
кажне кечын кокла шот дене 60 еҥым эмлалташ пыштат. Пытартыш кок арняште
пациент-шамычын чотышт 4 процентлан иземын.
Коронавирусын
куштылго формыж дене черланыше-влак амбулаторно эмлалтыт да шке жапыштыже налын
шапашлыме препаратым яра налыт.
Кислород
эмлымверыште кийыше 46 процент пациентлан кӱлеш. Тудо чылалан да тичмашын сита.
Республикысе эмлымверлашке ИВЛ аппаратым ситарыме. Медицине пашаеҥ-шамычлан
палемдалтше шкем аралыме да дезинфицироватлыме средстве шотышто чӱдылык уке.
Эртыше у ий да
рошто пайрем кечылаште калыкым тестироватлыме чотым иземдыме огыл – сутка еда
1360 анализым ыштыме.
Тазалыкым аралыме
министрын мутшо почеш, регионышкына коронавирус деч вакцинын 2292 дозыжым
кондымо. Тудым медицине организацийлашке шеледен колтымо. 11 январь марте 750
еҥлан прививкым ыштыме.
Медицине
пашаеҥ-влаклан выплатым тичмашнек тӱлымӧ.