22 декабрьыште
Марий Элым вуйлатыше Александр Евстифеев Волжск оласе 5-ше №-ан школ пелен
ешартыш у тунемме корпусым торжественно почын. Ты кечынак тудо Волжскысо тулык
да ача-ава деч посна кодшо икшыве-влаклан рӱдерын воспитанникше-шамычлн у ий
пӧлекым кучыктен.Палемдыме
школ пелен ешартыш 336 веран у оралтым чоҥаш, «Образований» национальный проект
дене келшышын, 169 миллион наре теҥге ойыралтын. Туныктышо ден тунемше-влак
вучен шуктеныт: у корпусын кабинетлаже волгыдо да кугу улыт, тыштак – спорт ден
актовый зал-шамыч, книгагудо, ӱмбал вургемым кудашаш йӧнан вер, класслаш
кызытсе жаплан келшыше оборудованийлам вераҥдыме, ик пачаш гыч весыш кошташ
лифт пашам ышта. Икманаш, сайын тунемаш да туныкташ чыла йӧн ышталтын.
«Тиде
школышто посна предмет-влакым келгын тунемыт, шке пашаштым палыше
профессионал-шамыч тыршат, тунемше-влак тӱрлӧ кӱкшытан олимпиадылаште шкеныштым
ончыктат. Сандене тыгай образовательный базе моткоч кӱлеш», – каласен Александр
Евстифеев.
Волжскысо
тулык да ача-ава-влак деч посна кодшо йоча-влаклан рӱдерыште лиймыж годым тудо
у коррекционный да тазалыкым пеҥгыдемдыме у зданийыште лийын, мучашлан чылаштым
шушаш У ий пайрем дене саламлен да воспитанник-влаклан пӧлекым кучыктен, а
рӱдерлан – видеоаппаратурым: телевизорым, микрофонан медиаситемым,
онлайн-урокым эртараш оборудованийым.
Марий Элым вуйлатышын
лӱмжӧ дене тений У ий вашеш тыгай радамыш пурышо 8 тӧнежлан пӧлекым пуат, чумыр
налмаште тушто 394 ӱдыр-рвезе кушкеш.