Марий Эл Республик

Могай-тугай ойыртемалтше сыр? Уна-влакын йодышыштлан ӱмаште февральыште почмо у цехым вуйлатыше Г.Коняева вашештен: «Тиде – камамбер, Францийыште ик эн кумдан шарлыше сыр. Тудым ыштен лукмо технологий дене палыме лияш тӱҥ технологна лӱмынак Францийыш миен коштын. Ончыч 100 килограмм шӧр дене ыштен луктынна гын, варажым шукырак да шукырак. Тыге декабрьыште 1 тонн 300 килограмм марте шуктенна, а уло цехын вий-куатше – тылзылан 3 тонн. Камамбер деч посна эше кок тӱрлӧ француз сырым ыштен луктына: иктыже – гратен, весыже – шевр».

«Лукоз» СХП» ООО-н учредительже В.Кожановын мутшо почеш, тыгай сырым кажне айдеме огеш коч, сандене чылан огыт нал, тидлан кӧра у цех экспериментальныйлан шотлалтеш. «Кунам мыланна «сайын чучаш тӱҥалеш», тунам цехым кумдаҥдыме да производствым кугемдыме нерген шоналтена. Чылажымат сайын ыштыман, тыгодым тунеммым чарныман огыл — чыланат икгай сатум ыштен лукташ оҥай огыл, кажне предприятий мо дене гынат ойыртемалтшаш. А ме марий мландыште пашам ыштымына дене кугешнена, кугешнена марий каза дене, сандене эн ончылно лийме шуэш», –  палемден тудо.

Кызыт предприятийыште 3 000 утла каза уло, 600 наре шорык. Ушештарена, казан чотшым 10 000 вуй марте шукташ шонымаш уло. Агрохолдинг вуйлатышын мутшо почеш, ончыкыжым йоча кочкыш сатум ыштен лукшо заводым, тыгак вольыкым ашныме моло объектым чоҥаш палемдыме.

«Лукоз» предприятийыште у фермым Марий Эл Республикым вуйлатыше А.Евстифеевын кӱштымыж почеш почмо. Палемдыман, тиде агрохолдинг вияҥеш, садлан тудлан да вольыкым ашныме республикысе уло отрасльлан кугыжаныш полышым пуымо шотышто пашам ыштена. Тыге 2017 ийыште ялозанлык сатум ыштен лукшо моло производитель дене пырля льготан 950 миллионлан 11 инвестиций кредитым налаш соглашенийым ыштыме, тышеч 700 миллионжо – «Шернур сырзавод» ден «Лукозлан», – каласыш Ю.Сидыганов.

Марий Эл Республик вуйлатышын общественный кыл да увер управленийжын материалже негызеш Г.Кожевникова ямдылен.